خطط لتقليل تكاليف السفر الي ماليزيا

ملاحظات مهمة:
كوالالمبور:

- أول ما توصل المطار اسأل عن الباصات الحمراء  تلقاها تحت البدروم الثاني إنزل مع الدرج المتحرك واسأل هناك يوصلونك لحد باب الفندق بـ 15 رينقت للفرد أو للـ كي إل سنترال بـ 9 رينقت ... علما أن التكاسي ما يقل عن 70 رنقيت كما سمعت.
- اشتر مظلة  من هناك ترا تحتاجها وأحس ما في مظلاتهم إنها رخيصة وتطوي بشكل صغير يدخل في شنطة الظهر أو الشنطة اليدوية مع الابتوب.
1- اصرف الفلوس على قدك هنا ثم الباقي خذه كاش واصرفه هناك ... أرخص شيء لقيته عند محطة كي إل سنترال.
2- انتبهوا من البياعين الصينيين تراهم غشاشين  وكااااااااااااسروهم اللي يقول بمية من غير مبالغة قله بـعشرة.
3- إذا قدرت تقنع التاكسي يشغل العداد (الميتر) يكون أرخص  وإذا رفض اتركه.
4- استخدم القطارات في تنقلاتك تراها رخييييييييييييييييييييصة  إذا بغيت تطلع من الفندق اسأل عن أقرب محطة للمكان اللي تبيه وانزل فيها مسافة 3 دقايق مشي تكون وصلت بلا تاكسي بلا مصاريف وأغلى تذكره للقطارات بـ 2 رينجت ونصف بس.
5- بتسمع ألفاظ سب أو همهمات (طننننننننش)  مهما كانت الألفاظ .. أنت رايح توسع صدرك مالها داعي تعكر مزاجك عشان ألفاظ طايره في الهواء.
6- مايسمى بشارع العرب اسمه (بوكيت بينتانج) حتى فيه محطة مونورويل (قطار معلق) بهذا الإسم تنزلك عند البنك اللي يتجمع عنده الناس في وسط شارع العرب ولا تكلفك أكثر من رينجت ونص.

جنتنق:

إذا أنت ما راح تسكن فيها احجز لجنتنق من محطة الـ كي إل سنترال ( محطة قطارات [ميترو] وباصات في وسط كوالا) فيه مكتب خاص بجنتنق احجز منه قبل الرحلة أقل شيء بيوم وتكون الرحلة بالباص + التلفريك + الألعاب كاملة + العودة بالتلفريك + ثم العودة لنفس المحطة بـ 42 رينقت للفرد البالغ ولا تنس تحدد وقت العودة من المكتب تراهم نكبات ما يحددون أنت اللي تحدد لازم تحدد وقت الإنطلاق بالباص والعودة بالباص باكراً أما التلفريك أمره سهل صف سرا واركب .... أما إذا أنت مطخطخ ترا التاكسي بـ 180 رينقت  أرخص شيء.
- لا تنس تأخذ معك ملابس تراها بااااااااااردة

بينانق:

1- بينانق هيلز (مرتفعات بينانق) القطار اللي يصعد فوق معطل وفيه صيانة وما أظنهم بينتهوا منه قريب  .
2- التكاسي فيها غاااااااااالية أحسن شيء تأخذه بالساعة وفهمه إنه إذا وداك مشوارك بسرعة راح يوفر على نفسه البنزين.
3- أحسن شيء فيها الشاطيء اللي خلف فندق الهوليدي إن  شمال بينانق وأنصحك تسكن قريب من المنطقة هذي لأنها منطقة ممتعة في النهار عند الشاطئ وفي الليل عند بسطات الصينيين حتى الساعة 11 مساء تقريبا.
4- وفر على نفسك التكاسي وخذ الباصات أنا أخذت الباص للمطار من محطتهم الرئيسة في منطقة كومتار قريب من المنارة حقتهم رحت للمطار بـ 2 رينقت للشخص الواحد بينما التاكسي بيأخذ 70 رينقت. صحيح يطول الباص لكن اطلع مبكر ووفر فلوسك وتفرج وأنت بالباص خاصة إنها باصات متطورة وفيها شاشات إل سي دي وباردة  ... وأهم شيء تعرف أرقام الباصات تلقاها معلقة ومبيّن فيها المناطق اللي تمر فيها .. وإذا ما عرفت اسأل.
-أنا بصراحة بينانق  ما حبيتها باستثناء البحر بما فيه من رياضات بحرية، مع احترامي لأراء المسافرين.

لنكاوي:

1- أول ما توصل المطار احجز لك رحلة للمنجاروف  من المكاتب اللي في المطار تراها أرخص من الفندق بكثيييييير ويأخذونك من الفندق مباشرة احجز لنفس اليوم أو من بكرا والأفضل تكون رحلة المنجاروف صباحاً من الساعة 9 بالكثير مدة الرحلة ساعتين ونصف.
2- احجز لك جولة  من نفس المكتب على الجزيرة وإذا أنت عارف الأماكن خذ لك تاكسي بالساعة أرخص وأنا أنصح بسائق شايب مسلم اسمه شريف معي رقمه إذا سمحت إدارة المنتدى بوضعه كتبته لكم وأفضل وقت للجولة تبدأ من 12 الظهر وأنصحك انك تستغل اليوم المشمس  قدر الإمكان لآنك ما تظمن بكرا يصير مطر  ويخرب برنامجك
3- في مطار بينانق في مكتب كوبون تاكسي خذ من عنده التاكسي للفندق تراه أرخص والسعر موحد.
4- أنا حبيت  لنكاوي شوارع نظيفة ناس محترمة ومنظمين وطبيعة تفوق الخيال سبحان الله جنة الله في أرضه.